So Good寻味之旅-香港篇

睇“苏good”好长一段时间，对里面嘅美食一直垂涎三尺，网上有好心人整理了阿苏推介嘅地址，于是09年圣诞前夕我们慕名而去寻味。。。

讲食少唔到云云，本来仲有一个好为食同埋好失晕嘅ee。。。但係佢居然真係临出发前先发觉无香港签证。。。

美食多数集中喺港岛区，我地嘅美食之旅就从果边嘅上环开始。。。

第一站係越来越多分店嘅，位于上环禧利街嘅“生记清汤牛腩面家”，坐地铁到上环站出来，行5分钟左右，问问人就可以揾到。去到嘅时候十一点左右，周围其实静英英，但係呢度要排队等位了。。。阿苏推荐牛爽河，我就去试其他美食家推荐嘅粥，粥底绵，据说都係泰国靓香米，料劲多，我地三个人就叫一碗都觉得足够了。。。小p试咗个河粉，觉得一般般，食唔出有咩咁特别，牛腩反而唔错。另外点嘅煎鱼饼就不过不失啦。


跟住步行去附近苏杭街（上环站A2出口附近）嘅“永合成茶餐厅饼店”，听过名都谂唔到呢度嘅煲仔饭好出名。。。我地三个人只要咗一个牛肉饭，一杯奶茶，再加三个碗仔。。。个老板娘望望我地，有d奇异嘅目光，呵呵。。。


d牛肉好多而且嫩滑。。。捞晕之后基本上每啖饭都成口牛肉。。。不过呢度嘅煲仔饭无饭焦，我就觉得可能燶d会香d。。。


奶茶继续保持香港奶茶嘅水准，而且个杯好有怀旧feel：）


食饭期间见到老板嘅仔好似係放学归来，一坐低就点咗个腊味饭，睇落都唔错。呢度嘅另外一个招牌猪扒煲仔饭下次先试咯。。。

第三站係去香港三大云吞面之一嘅“麦奀记”（另外两家係池记同何鸿记），行去嘅途中我地咁岩见到“保心安油”嘅总部，厂家直销，云云咁岩要帮人买，价格个阿姨话最平嘎啦，呵呵。。。


麦奀记云吞面老实讲都唔错，其实云吞面整法唔算复杂，猪骨，大地鱼，虾子，虾壳熬成的汤底，半肥瘦猪肉加虾粒做馅的云吞，加上鸭蛋做成的面就行了。不过呢几样嘢要夹得好，同埋一贯保持水准，就真系难了。。。我谂香港三大云吞面家保留嘅就系呢种做云吞面嘅精神同传统。。。其实好多人都话香港而家嘅云吞面都係广州传统云吞面，但係点解喺广州始终揾唔到一家好食过香港嘅呢？


就喺呢条街附近，几分钟路程，有另外一间阿苏推荐嘅饺子店“王府”，有最新鲜好食嘅番茄饺子同冬瓜饺子，但係我对水饺兴趣不大，而且觉得呢两种馅料做饺子好食么？可能真系要食过至知了


路过经常电视见到嘅场景，斜坡楼梯，顺便影张合照啦。。。


呢间章记铜铁仲喺度。。。但係呢种手工艺仲有几多市场需求呢？


行完中环顺势就过去湾仔继续觅食，呢次嘅主角係做斋菜嘅“东方小祗园寿菜”，我唔知点解斋菜叫寿菜，但係呢度嘅斋菜真系几多品种，我谂只有广州当年嘅“菜根香”先有咁多选择咯。。。我样样都要d，每款斋菜都係六文一斤，价格公道嘅。。。我跟住问多次几钱嘅时候，个老板娘好搞笑咁话。。。放心啦，同比阿苏嘅一样多噶。。。呵呵，睇来好多人都係睇咗电视慕名而来嘅。。。


再落来就系去我05年第一次去香港嘅时候，香港同事特登带我去嘅“大利清汤腩”，呢间店铺基本上明星们都帮衬过，老店已经拆咗变成一栋住宅楼，新店搬咗去附近嘅巴路士街，水准依然出色，我成日谂，点解广州无清汤腩嘅？点解广州嘅整法都係柱候焖嘅？点解广州嘅牛腩无得拣唔同位置来食？


呢个问题肯定无答案嘎啦。。。如果以后我中咗五百万，我或者会将一d广州无嘅美食引进入来嘅。。。


感觉咖喱都係唔够清汤好食。。。


我就始终食唔到传闻嘅崩沙腩，继续留个遗憾，下次再来！

食咗成日，都要比时间消化下，跟住例牌去咗朗豪坊同埋又一城行街shopping。。。唔到你唔承认，节日气氛嘅布置同装饰，香港嘅Mall真係做得比广州好好多。。。主要係设计同心思啊。。。






香港真的每个大商场都有好大型嘅装饰，比游客，顾客影相留念，仲会有好多show睇，真係好有气氛。。。呢个係又一城嘅，小装饰而已。。。


每次香港，都会好满足，无论食嘢定系买嘢。。。呵呵，云云今次都好满足。。。yeah~！（ee走宝咯。。。）

[本日志由 young 于 2010-04-25 11:46 AM 编辑]
文章来自: 本站原创
引用通告: 查看所有引用 | 我要引用此文章
Tags: